L’Institut dal Dicziunari Rumantsch Grischun ha ina nova pagina d’internet

Suenter in tozzel d’onns sa preschenta l’Institut dal DRG (IDRG) en la rait en in nov vestgì: www.drg.ch

La nova pagina d’internet è vegnida creada en stretga collavuraziun cun ina fatschenta spezialisada per design da web. Il resultat è ina pagina frestga ed attractiva che porscha ina pluna infurmaziuns
davart l’Institut dal DRG e davart la Societad Retorumantscha (SRR).

Il Dicziunari Rumantsch Grischun e l’informatica
Era l’Institut dal DRG cun tut ses cudeschs e milliuns da cedels n’ha betg pudì guntgir l’informatica. Dapi l’onn 1992 vegn il DRG redigì e stampà cun agid da computers. E gia set onns pli tard ha l’Institut ristgà da far ils emprims pass en l’internet. Quai è stà il mument ch’ins ha realisà l’emprima pagina d’internet e che tut las collavuraturas ed ils collavuraturs dal IDRG han survegnì lur adressa dad e-mail.
Actualmain èn las persunas responsablas dal IDRG londervi da renovar en il rom d’in project da plirs onns l’infrastructura informatica en tut il manaschi. Ina part dal project furma la nova pagina d’internet.

Tge fa l’Institut dal DRG?
L’Institut dal DRG, fundà l’onn 1904, publitgescha il pli grond vocabulari rumantsch. Quel cuntegna l’entir stgazi da pleds da tut ils idioms e dialects, documentà a partir dal 16avel tschientaner fin al di dad oz, inclusiv la lingua discurrida. Il DRG è in dals quatter vocabularis naziunals da la Svizra. L’Institut dal DRG è ultra da quai er in impurtant center da documentaziun, perscrutaziun e d’infurmaziun per la lingua, la cultura e l’istorgia retorumantscha u insumma in’adressa indispensabla per la cultura alpina.

Institut dal DRG, Ringstrasse 34, 7000 Cuira, 081 284 66 42, info@drg.ch, www.drg.ch.
Ans visitai era sin facebook: http://www.facebook.com/Dicziunari.