05:42
Sogn Gion e sogn Paul, frars marters. pdf: cheu l'entira historia / Sogn Gion e sogn Paul, frars marters Ils 26 da zercladur: Sogn Gion e sogn Paul, frars marters Quels dus sogns frars survevan sco …Daplü
Sogn Gion e sogn Paul, frars marters.

pdf: cheu l'entira historia / Sogn Gion e sogn Paul, frars marters
Ils 26 da zercladur: Sogn Gion e sogn Paul, frars marters


Quels dus sogns frars survevan sco buns cristifideivels en la cuort dil grond imperatur Constantin: Paul sco secretari e Gion sco maiordom dalla princessa Constanzia. Ussa smanatschavan rebels da attaccar e ruinar tiaras digl imperi roman. Perquei tarmetta Constantin siu pli capavel cumandant Gallican cun sia schuldada encunter quei prigulus inimitg. Gallican che fuva in pagaun, accepta quei camond denton sut duas cundiziuns: tier ina victoria daventar prefet da Ruma e sco secund la feglia Constanzia per dunna. Gallican fuva vieus e veva duas feglias. Constanzia che veva fatg il vut da castiadad dat tier, denton cun las cundiziuns che Gallican prendi ils dus survients Gion e Paul en sia armada e surlaschi sias duas feglias ad ella, entochen ch’el tuorni. Cun sia sontga veta e cun oraziun po Constanzia converter quellas duas soras pagaunas tier Cristus. Denton vegn Gallican cun sia armada tschinclaus en dils rebels. En tutta anguoscha e senza speronza sevolva el cun in sacrifeci tiel fauls diu Mars. Ils dus sogns frars observan quei e cloman: Metta giu in vut al ver Diu dil tschiel e dalla tiara ed empermetta da daventar cristians, lu vegns ti a ver la victoria enta maun. Gest il mument ch’il capinani empermetta da far quei, cumpara in giuven cun ina crusch si dies e di: Pren la spada e suonda mei! Gallican e sia pauca glieud suondan quei gliuven e vesan ina entira armada cun spadas tratgas vegnend en agid. Vesend quei, peglia il retg dils barbars tema, semetta en schanuglias e roga per la veta. Cun l’intenziun da daventar cristians, rimna Gallican sia schuldada e tuorna victoriusamein a Ruma. Fetg consolaus ei Gallican staus da saver che sias duas feglias eran ussa cristianas. Per semussar engrazieivels a Diu, selai el battegiar. Encunter sia veglia daventa el lu prefect da Ruma e sin nozzas desista el era. Duront siu uffeci dat el la libertad a 5‘000 sclavs ed alla fin venda el tut sias rihezias e serenda a Ostia Tiberina. Leu s’entaupa el cun sogn Hilari ed els baghegian ensemen baselgias ed in spital. Ils 25 da zercladur vegn Gallican marterisaus entras igl imperatur e tiran Julian che veva en egl sia rauba. Era ils dus sogns frars Gion e Paul ein puspei arrivai a Ruma e surviu leu alla sontga princessa Constanzia, aschi ditg ch’ella ei vivida. Suenter la mort dils fegls da Constantin ei siu nevs Julian daventaus imperatur, in um senza cardientscha e grond persequitader dils cristifideivels. Sper sias tiranias prendeva el tutta rauba dils cristians cun la fenta che Cristus hagi vuliu che ses suandonters vivien en paupradad e bandunien lur fatg. Savend che Gion e Paul seigien cristians e possedien grondas rihezias neu da Constanzia, camonda el a siu capitani Terenzian da drizzar ora als dus frars ch’els hagien aunc 10 dis peda da seresolver d’adurar ils dieus digl imperi ni ch’els seigien dalla mort. Ils dus sogns lain saver ch’el dueigi buca piarder ils diesch dis, els seigien semtgai da sponder lur saung pil sulet ver Diu. Els sepeinan pil marteri cun parter ora tutta lur rauba als paupers, cun urar di e notg e serecumandar a Diu. Sils 10 dis encunter sera ariva Terenzian cun schuldada e presenta als dus frars ina statua da Jupiter cul camond digl imperatur dad adurar quel ni da vegnir scavazzai immediat. Ils sogns confessurs semettan en schanuglias, engrazian a Diu per tut il bien. Entuorn mesanotg vegnan els mazzacrai en lur atgna casa. Per tema ch’ei savessi levar si ina revolta denter il pievel, lai Terenzian discusamein satrar ils corps en lur casa. Muort las miraclas daventadas leu, ei quei marteri che fuva staus ils 26 da zercladur digl onn 363 vegnius alla glisch. Terenzian roga tiels sogns per perdun e seconverta cun sia famiglia tier la cardientscha da Cristus, ferton che Julian miera in onn pli tard desperadamein.