04:39
Sogn Duri, uestg e confessur. pdf: cheu l'entira historia / Sogn Duri, uestg e confessur Ils 4 da fenadur: Sogn Duri, uestg e confessur Sogn Duri ei naschius igl onn 893 ad Augsburg en Tiaratudestga.…Daplü
Sogn Duri, uestg e confessur.

pdf: cheu l'entira historia / Sogn Duri, uestg e confessur
Ils 4 da fenadur: Sogn Duri, uestg e confessur

Sogn Duri ei naschius igl onn 893 ad Augsburg en Tiaratudestga. Siu bab fuva cont da Kyburg e Dilinga. Gia els onns d’affonza deva el enzennas da sontgadad. Cun treis meins fuva el aunc schi zaclins che negin deva ad el liunga veta. Denton ei il buobet da 7 onns vegnius mess en la claustra da sogn Gagl, nua ch’el fageva grondius progress en pietad ed en studis. Bugen fuss el restaus leu per adina, mo la voluntad da Diu ei stada autra. Igl uestg da Augsburg consecrescha Duri per augsegner e tschenta el cuort sisu sco administratur dil canonicat. Suenter in temps va il sogn a Ruma per visitar las reliquias dils sogns apostels. Cheu survegn el novas dalla mort digl uestg Adalbero. Sin quei ha il papa dau d’entelgir che Duri hagi da daventar uestg d’Augsburg. Cura ch’il sogn canoni ha enderschiu da tala finamira, eis el discusamein ius ord il marcau da Ruma e per quella ga mitschaus dil buordi episcopal. Mo suenter 15 onns ei quei uestgiu danovamein daventaus vacants. Quella gada ha sogn Duri encunter sia veglia stuiu surprender quella aulta dignitad e quei en in temps che cunzun la regiun d‘Augsburg vegneva ruinada, arsentada e sblundergiada dils Huns e Slavons. Sco niev uestg semetta Duri cun tut quitau vid il reparar las baselgias destruidas. Sper tut il grond engaschi lai il sogn buca sut da tener devoziuns, survetschs divins, da meditar, vigliar, gidar malsauns ed assister als moribunds. Savens cloma el ensemen il clerus per examinar las caussas co guvernar las olmas. Il sogn uestg fuva era in grond veneratur dils sogns. Savens ha el visitau lur fossas, sco per exempel a sogn Murezi el Valeis, a Nossadunaun ed a sogn Gagl. Era ha sogn Duri anflau il tgierp dalla martra sontga Afra. Duront sia veta ein biaras miraclas daventadas. Igl ieli ch’el benedeva la Gievgia sontga deva la sanadad a malsauns che vegnevan unschi cun quel. Il duca da Baviera fuva in grond inimitg da sogn Duri. Ina gievgia sera en discussiun cugl uestg da Constanza secumblidan omisdus ed emblidan la tscheina. Da mesanotg cumpara il currier dil duca cun ina brev. Duri legia, dat risposta e relai el cun aunc ina buccada dil barsau dalla tscheina. Per saver sclamar ils dus uestgs, ch’els hagien buca teniu en il venderdis, tuorna il currier cul toc carn a Baviera. Mo cura ch’el stat avon il duca cun sia schliata intenziun, sche fuva la carn semidada en in pèsch. Per memoria da quella miracla vegn sogn Duri presentaus cun in pèsch enta maun. Suenter grondas stentas e quitaus per siu uestgiu, vuleva sogn Duri semetter a ruaus per saver sepreparar sin ina beada mort. Cun quella finamira nominescha el cun consentiment digl imperatur Adalbero, in da ses nevs per siu successur. Suenter paucs meins miera Adalbero e sogn Duri sto puspei surprender il buordi entochen la fin da sia veta. En sia davosa malsogna roga il sogn avon tuts presents per perdun per ses sbagls commess ed avon che murir parta el aunc ora als paupers tut quei tec ch’el possedeva. Ils 4 da fenadur digl onn 973, en la vegliadetgna da 80 onns renda sogn Duri beadamein si’olma al Scaffider. Il tgierp che deva giu in’emperneivla odur han ins satrau solemnamein en la baselgia da sontga Afra e biaras miraclas ein leu daventadas.