Priedi festiv da Msgr. uestg Vitus Huonder en claustra a Mustér
ils 21 d‘uost 2011
Car Monsignur Avat, cars Conventuals, frars e soras en Cristus,
uonn, il meins da schaner, ha igl institut Harris Interactif fatg en Frontscha ina retscherca, ina enquista sur il tema: Ils Franzos e Dieus (Les Français et Dieu). 8 % dils questiunai han dau la risposta che la dumanda da Diu seigi per els negin tema. 34 % han aviartamein detg ch'els creian buc en Diu, 36 % han rispundiu cun: "Gie, jeu creiel"; e 22 % han priu posiziun cun la remarca: "Jeu sai buc propi, denton fetschel jeu la damonda." Interessant ei che 42 % manegian, ei seigi grev da discuorer sur da Diu, d'ina vart perquei ch'ins s'occupeschi buc dalla caussa, dall'autra vart perquei ch'ins anfli buc il bien contuorn per tschintschar sur il tema. Denton lessan 62 % dils questiunai puder s'exprimer sur las damondas ch'els han concernent Diu.
Jeu manegel che quella statistica ei era valeivla per nossas regiuns, per nossa tiara e per nies pievel. Quei dat da patertgar e nus sentin in cert malruaus.
Nus havein ual udiu ord il Prophet Zefania ni Sofonias ils plaids: "Buca tema, Sion, buca lai pender la bratscha. Il Segner tiu Diu ei cheu en tiu miez. El, il pussent, vul spindrar." Sche nus considerein il resultat dalla statistica, duvrein era nus ils plaids che conforteschan e che datan curascha: "Buca tema, buc lai pender la bratscha." Nus vivin en ina situaziun che pretenda in grond sforz per star ferms ella cardientscha. Igl ei aschia, sco l' inquista di: Nus anflein buc pli il bien contuorn per discuorer sur il tema da Diu. Jeu less cumpletar quella constataziun cun la remarca: Nus anflein buc pli ni mo vess il bien contuorn per practicar, per viver la cardientscha. En quei grau ei quel che crei savens sco in jester en siu contuorn e sesenta buc pli da casa. Denton astgein nus buc schar pender la bratscha.
Dall'autra vart fagein nus adina puspei l'experientscha dils plaids: "Il Segner tiu Diu ei cheu en tiu miez. El, il pussent, vul spindrar." Gie, sche 62 % lessan s'exprimer sur damondas ch'els han concernent Diu, lu ei quei era in segn dalla preschientscha da Diu, dil Diu che muenta ils cors e che less spindrar, che less dar al carstgaun la pusseivladad da s'entupar cun el, d' emprender d'enconuscher il Segner. Da quella caschun stuessan nus trer profit e crear il contuorn necessari per dar vinavon nossa cardientscha. Era en quei grau duvrein nus curascha e fidonza en igl operar dil Spert Sogn.