Clicks326
Plaisch
1

Igl aunghel dalla Palentada meina al liug dil salit

Co la Tradiziun apostolica nescha

Sogn Gion evangelist figurescha sco model dil spiritual egl evangeli da Sogn Gion. Niessegner cammonda a sogn Pieder da suandar El e a Gion da restar aschia tochen ch’El vegni. Quei vul dir che sogn Gion duei restar il medem e mussar quei che Niessegner sez veva fatg.

Sogn Gion duei pia mantener il caracter sacerdotal. El senumna igl auter giuvnal che Niessegner haveva bugen. Auter manegia tenor la significaziun veglia da quei plaid «il secund», pia, il secund Cristus.

El davos capetel dalla Palentada raquenta sogn Gion sco igl aunghel muossa ad el il flum cun las dodisch plontas cun feglia duront dodisch meins. Suenter haver viu quei vul sogn Gion adurar igl aunghel. Igl aunghel denton impedescha quei ei di ch’el seigi in survient sco igl apiestel. Tgei vul quei dir? Ei igl aunghel in survient, ensemen cun igl apiestel?

Ella Bibla ei igl aunghel il guid che meina las olmas. Igl aunghel dalla Palentada meina sogn Gion a veser la grazia. Igl aunghel dalla palentada meina il sacerdot al flum ch'ei circumdaus dallas plontas, q.v.d., alla tradiziun apostolica.

Igl aunghel ei pia in survient che adimplescha la funcziun sacerdotala da menar. La Baselgia sto menar la glieud al salit, menar stat en connex cun veser. Niessegner ei naschius per que nus sappien veser cun la glisch immortala.

La Baselgia catolica ei ina societad angelica che sto survir Diu. Ils spirituals vesan ils misteris dalla cardientscha ella mesira ch’ei selain guidar tras quels ch’ein tarmess da Diu.
Don Reto Nay
Igl aunghel ei ella Palentada il simbol dalla liturgia che astga, malgrad sia bellezia angelica, buca restar en sesez mobeina sto menar al Sogn Spert ed entras el el cor dalla Sontga Trinitad (cf. Palentada 19,10: «adura Diu!»)