02:17
A TASSA DU TEMPIU - LA TASSA DEL TEMPIO in versi siciliani a cura di Padre Giuseppe Licciardi. LA TASSA DEL TEMPIO tratto dal Vangelo di Matteo 17,22-27 in versi siciliani che potrete leggere mentre …Altro
A TASSA DU TEMPIU - LA TASSA DEL TEMPIO in versi siciliani a cura di Padre Giuseppe Licciardi.

LA TASSA DEL TEMPIO tratto dal Vangelo di Matteo 17,22-27 in versi siciliani che potrete leggere mentre ascoltate cliccando su (Espandi) a cura di don Pino Licciardi.

A TASSA DU TEMPIU
(Mt 17, 22-27)

Mentri chi caminavanu pi strati
da Galilea, tra chiacchiari e risati,
a un certu puntu, isannu la so vuci,
Gesù: "Vi vogghiu diri unni cunnuci
-ci dici a tutti- a strata c'haiu a fari:
o Figghiu 'i l'omu a genti havi a pigghiari,
e i so nimici po' l'hannu ammazzari,
ma u terzu jornu havi a risuscitari!".

A tutti stu discursu li stranìa
e l'amariggia mentri sû p'a via.
Ma, appena ca a Cafarnau iddi arrivaru,
l'esatturi di tassi l'avvistaru
a dritti dritti a Petru avvicinaru
e senza storii po' ci addumannaru:
"U to Maistru a tassa nun la paga?".
Petru arrispunni: "Certu ca la paga!".

Appena trasi dintra, prima ancora
ch'iddu a so vucca rapi e soccu fora
ci havia successu si metti a cuntari,
avanti Gesù pigghia, e addumannari
cumincia: "Petru, ma chi ti nni pari?
Ai re da terra cu è c'avi a pagari
li tassi? I propri figghi o puru i stranii?"
E Simuni arrispunni": "Sulu i stranii!".

E vulennu u discursu continuari,
Gesù agghiunci: "Pi figghi, di pagari
li tassi un c'è bisognu. Nun ti pari?
Ma certu è sempri megghiu d'evitari
discursi ca la genti un pò affirrari.
Nun c'è bisognu di scannaliari
a nuddu. Tu, chiuttostu, scinni a mari
e jetta a lenza prontu pi piscari.

U primu pisci chi s'attacca all'amu
pigghialu, ca la tassa ci pagamu
a chiddi di lu tempiu cu a munita
chi ci trovi mmucca. É a tassa stabilita
pu tempiu du Signuri. Lassu a tia
pagari a tassa pi tia e pi mia.
Tutta la liggi s'havi ad osservari,
si la nova giustizia havi a spuntari".

Padre Giuseppe Licciardi (don Pino)