04:54
Sogn Anselm, arzuestg e confessur. pdf: cheu l'entira historia Sogn Anselm, arzuestg e confessur Ils 21 d’avrel: Sogn Anselm, arzuestg e confessur Sogn Anselm ei naschius igl onn 1033 ad Aosta ell’Italia …Daplü
Sogn Anselm, arzuestg e confessur.

pdf: cheu l'entira historia
Sogn Anselm, arzuestg e confessur
Ils 21 d’avrel: Sogn Anselm, arzuestg e confessur


Sogn Anselm ei naschius igl onn 1033 ad Aosta ell’Italia. Il bab ch’era cont, fuva fetg surdaus al mund. La mumma era denton pietusa e veva mussau al buobet la tema da Diu e la devoziun tier Nossadunna. Anselm veva buns talents e deva tutta speronza da daventar in grond um. Essend la mumma morta, ha Anselm entschiet cun ina veta cumadeivla. Muort las schliatas relaziuns cul bab ha Anselm bandunau sia patria e serendius en Frontscha senza saver tgei far. Cun 18 onns ha el lu entschiet a studegiar filosofia e teologia. Di e notg seprofundava Anselm schi fetg els studis ch‘el ei sedecidius per la ductrina e sontgadad. Cun quella finamira entra el lu en la claustra benedictina da Bec ella Normandia. Gia suenter treis onns ei pader Anselm daventaus priur da quella claustra. En quei uffeci ha el mussau gronda carezia, humilitonza e prudientscha. Suenter la mort digl avat ei Anselm vegnius eligius superiur dalla claustra. Sia aulta ductrina tarlischava lunsch sur la tiara ora e Diu palesava sia sontgadad cun miraclas. Entras quei vegneva il sogn avat veneraus d’uestgs, da retgs e da papa Gregori VII che serecumnadavan cun brevs a sias oraziuns. Per ademplir certas fatschentas da sia claustra, ei sogn Anselm serendius ell’Engheltiara. Tras la mort da Lanfranc, arzuestg da Candelberg che fuva staus siu professer ei quei uestgiu staus 4 onns vacants. Igl onn 1093 ha il clerus ed il pievel vuliu el per arzuestg. Cun admonir retg Wilhelm II che fuva sepatrunaus dallas entradas dalla Baselgia, ha sogn Anselm tratg sur da sesez ina greva persecuziun. Sevestgius da pelegrin, banduna il sogn siu uestgiu e va a Ruma tiel papa per remetter siu uffeci. Il papa vess salvau Anselm el Lateran, mo il sogn ha vuliu serender en la claustra San Salvatore a Telese, perquei ch’igl avat da quella claustra fuva staus siu discipel a Bec. Il papa cloma el sco assistent tier la sinoda a Bari. Cun sia gronda sabientscha e faviala sa el perschuader ils herets grecs che vevan caschunau gronda confusiun sur dalla vegnida dil sogn Spért. Sil retuorn da Bari eis el lu serendius a Lion. Denton ei il retg Wilhelm morts e siu successur Hendri I ha vuliu ch’igl arzuestg Anselm tuorni puspei a Candelberg. Mo danovamein ha ei dau dispeta denter retg ed arzuestg. Quella gada pervia dils beins e dretgs ecclesiastics, dils quals Hendi vuleva sepatrunar. Puspei sto il sogn uestg fugir egl exil. Perquei va el a Ruma tier papa Pascalis II per la lubientscha da saver turnar a Lion. 16 meins ha quei exil cuzzau e lu ha Diu tuccau il cor dil retg ch’el ha viu en sias errurs e supplicau igl arzuestg da turnar a Candelberg. Ussa ha el retschiert tuts previlegis e tuttas libertads ecclesiasticas. Sogn Ansel ei staus igl emprem dils docturs che ha publicamein defendiu la Immaculada Concepziun da Nossadunna. Havend Anselm cun stentas e disgusts regiu 16 onns siu arzuestgiu, eis el vegnius malsauns e provedius culs sogns Sacraments dils moribunts. La mesjamna sontga, ils 21 d’avrel digl onn 1109, eis el sevestgius cun in cilizi e vegnius springius cun la tschendra. Duront che la passiun vegn legida ei il sogn spartius ruasseivlamein cun 76 onns.