05:32

Sogn Pieder, prenci dils apostels

pdf: cheu l’entira historia Ils 29 da zercladur: Sogn Pieder, prenci dils apostels Avon ch’esser clamaus tier igl apostolat senumnava sogn Pieder Simon. Quei glorius apiestel ei naschius a Betsaida …More
pdf: cheu l’entira historia

Ils 29 da zercladur: Sogn Pieder, prenci dils apostels
Avon ch’esser clamaus tier igl apostolat senumnava sogn Pieder Simon. Quei glorius apiestel ei naschius a Betsaida en Galilea ord ina famiglia da pescadurs. Siu frar Andriu che fuva era pescadur, meina Pieder tier Cristus il Messias e lez ha mirau sin el e detg: Ti eis Simon fegl da Jonas, dacheudenvi vegns ti ad esser numnaus Chefas che vul dir grep. Sin quel vi jeu baghegiar mia Baselgia e neginas forzas infernalas pon fierer ella per tiara. Paucs dis pli tard passa Jesus sper la mar da Galilea vi e vesa ils dus frars a fierer o las reits. Jesus di ad els: Suandei mei, jeu vi far orda vus pescadurs da carstgauns. Da quei mument bandunan els tut e daventan ses emprems apostels. Sco emprem nominau vesein nus Pieder adina en cumpignia cun Jesus. Cun quei ha Jesus vuliu dir che ord la nav da sogn Pieder hagi da vegnir perdegau la vera ductrina e ch’el seigi siu emprem pastur dalla Baselgia. Ornaus cun specialas grazias e previlegis resta il sogn apiestel adina humiliteivels. Quella humilitonza ha sogn Pieder pliras ga demussau viers Jesus; per exempel tier il lavar ils peis, ni sco puccont da buc esser vengonz da star en sia cumpignia, ni cura che disipels han bandunau lur meister pervia da sia ductrina. Era sche Pieder ha duas ga snegau Jesus, purtava il sogn gronda carezia tier El e giu gronda ricla. Cristus ei suenter sia levada cumparius a Pieder per consolar el. Avon che ir a tschiel ha Jesus treis ga dumandau: Pieder, carezas ti mei pli ch’ils auters e Pieder rispunda tuttas treis ga: O Segner, ti sas che jeu carezel tei! Sin quei ha Cristus dau ad el l’ordinaziun da pascular sias nuorsas sco emprem pastur e cau da sia sontga Baselgia. Ladinamein ha Pieder entschiet siu uffeci plein ardiment cun perdegar il misteri dalla sontga crusch. Tras sias marvigliusas ovras e miraclas ein mellis seconverti tier Cristus. Quei ei lu stau pils pagauns raschun da arrestar e gheslegiar il sogn. Sinquei serenda Pieder viers Samaria, passa tras Lidda e retegn siu viadi a Cesarea tiels pagauns. Leu instruescha e battegia el il capitani roman Cornelius cun tut sia famiglia. Turnaus danovamein a Gerusalem, han ils apostels denter els partgiu las tiaras dil mund. A sogn Pieder ha ei tuccau Antiochia. Duront siat onns ha il sogn da leu anora pastorau las provinzias tenor basegns dalla sontga Baselgia. Suenter quels onns tuorna il sogn apiestel puspei a Gerusalem. Per cuntentar ils gedius lai herodes metter a ferm il sogn cun l’intenziun da far murir el sco cau principal dalla Baselgia. Mo in aunghel arva la notg sias cadeinas. Pieder cuntinuescha cun ses viadis da missiun e tschenta igl onn 45 sia sedia a Ruma. Igl ei buca pusseivel da descriver cheu tut ils viadis e sias ovras per derasar la glisch dil sogn evangeli. Da quei temps ei era sogn Paul apiestel arrivaus a Ruma e Nero veva mess quei sogn gia nov meins a ferm. Sogn Pieder che vuleva lu seretrer dallas persecuziuns, s’entaupa sin la porta dil marcau cun Jesus e fa la damonda: Nua vas? Jesus rispunda cheu: Jeu tuornel a Ruma per puspei esser cruzifigaus. Pieder ha capiu ch’el hagi da star a Ruma per vegnir marterisaus. E daveras siara Nero il sogn cau dalla Baselgia en perschun cun sogn Paul. Suenter ina fetg ruha perschunia ein omisdus sogns apostels vegni sentenziai ils 29 da zercladus digl onn 69 alla mort. Sogn Pieder sco Gediu, la mort cul tgau engiu vid la crusch, sil cuolm dil Vatican e sogn Paul sco Roman, la mort entras la spada dado il marcau. Quei sogn prenci apiestel, vicari da Cristus e cau dalla sontga Baselgia vegn veneraus sigl entir mund ensemen cun siu cumpogn sogn Paul cun solemna fiasta.