05:34

Sontga Giuliana, purschala e martira

pdf: cheu l'entira historia / Sontga Giuliana, purschala e martira Ils 22 da matg: Sontga Giuliana, purschala e martira La sontga dad oz dat perdetga dallas bialas vertids che astgan vegnir ludadas …More
pdf: cheu l'entira historia / Sontga Giuliana, purschala e martira
Ils 22 da matg: Sontga Giuliana, purschala e martira

La sontga dad oz dat perdetga dallas bialas vertids che astgan vegnir ludadas era da quels ch’ein schiglioc inimitgs dils beins spirituals. Igl onn 439 ha il retg dils Vandals priu en Cartago e schau mazzacrar e metter perschuniers tuts signurs e burgheis. Rauba, intradas, ornaments e vischala dallas baselgias ha el tratg a sesez, mess en pupira ils habitonts e vendiu quels en sclaveria. Denter quellas noblas persunas fatgas sclavas, sesanflava era Giuliana, ina feglia catolica da gronda pietad e buna veta. Il marcadont Eusebi dalla Siria cumpra e meina la sclava en sia patria. Quei ei stau per ella ina ruha midada. Daventada sclava e paupra survienta, vesa ella quei per destin da Diu e seconsolescha da aschia esser in di alzada dapli enta parvis. Perquei ademplescha ella siu survetsch cun adatg e premura. Il patrun pagaun observa quella mudestadad e scheva beinduras, el lessi pli bugen piarder sias rihezias che sia sclava. Giuliana suandava fetg bein quei ch‘ils apostels sogn Paul e sogn Pieder vevan cumandau a tuts survients. Numnadamein da survir, obedir e star sut cun tema da Diu, buca mo als buns patruns, mobein era als schliats e crius. Per veglia da Diu astgava la sclava aschia viver en tutta libertad e suenter siu plascher. Suenter zacons onns ha Eusebi sco marcadont stuiu semetter sin la mar per transportar rauba en Frontscha. Era Giuliana sia fideivla fumitgasa sembarca. Gia daditg veva ella suspirau e rugau siu cruzifigau Salvader per la grazia da saver dar la veta per amur sia. Cun quella speronza eis ella pia semessa sin viadi. La nav arriva a Corsica gest da quei temps ch’ils pagauns tenevan ina fiasta solemna en honur da lur dieus. Duront che Eusebi va culs auters el tempel tiels idols, resta Giuliana zuppada en la nav. Il guvernatur pagaun Felici Saxo ei entras ses survients vegnius informaus ch’en la nav seigi ina sclava cristiana che sbetti lur sacrifecis e lur dieus. Eusebi sto dar plaid e fatg al guvernatur. Ed el defenda sia sclava cun tutta honur schend ch’ei seigi meglier da schar viver ella en pasch che da vuler far midar sia cardientscha. Felici seporscha ussa da cumprar la sclava per biars daners ni era da brattar per quater autras sclavas. Mo Eusebi vul saver nuot da tal marcau ni brat, pertgei el stema Giuliana pli che daners e pli che 4 autras sclavas. Cheu sesurvescha il guvernatur dad auters rampins per vegnir tier la sclava cristiana. Cun ina solemna gastaria bubrenta el si Eusebi taluisa che lez tut eivers lai menar sia Giuliana el palaz. Cheu pren Felici immediat la caschun da disponer la purschala tier in sacrifeci als dieus jasters. La sontga giuvna rispunda tafframein: Jeu sun ina cristiana, libra e sun ventireivla da saver dar la veta per amur da Jesus Cristus. Il tiran ravgiau lai dar schlaffadas e pender si ella pils cavels e gheslegiar. En quella dolorusa tempiasta benedeva Giuliana siu dultsch Salvader. Sper tutta ravgia temeva Felici che Eusebi savessi sedestadar ord sia eivradad e schurmegiar sia sclava. Perquei dat el la sentenzia che Giuliana dueigi vegnir cruzifigada sco siu Cristus. La sontga lauda Diu per quella grazia e roga da perdunar alla tschocca paganeglia. Sinquei vegn ella cruzifigada e si’olma ei cuort sisu sgulada veseivlamein encunter tschiel en fuorma d’ina columba. Quei sgarscheivel marteri ei staus ils 22 da matg digl onn 440. Ils aunghels avisan ils muntgs dall‘insla Gorgona da rabitschar quei tgierp ord Corsica. Discusamein meinan els quei scazi sin lur insla. 300 onns pli tard ha Arizza la dunna dil retg Desiderius dalla Lombardia translocau quellas reliquias a Brescia, nua ch’ellas vegnan aunc ozildi honoradas en la biala baselgia dedicada a sontga Giuliana.
Angy