05:53
Ils 22 d’uost: Sogns Timoteus, Hipolit e Sinforian, marters. pdf: cheu l’entira historia Ils 22 d’uost: Sogns Timoteus, Hipolit e Sinforian, marters Oz vegn fatg memoria el survetsch divin da quels …Daplü
Ils 22 d’uost: Sogns Timoteus, Hipolit e Sinforian, marters.

pdf: cheu l’entira historia
Ils 22 d’uost: Sogns Timoteus, Hipolit e Sinforian, marters
Oz vegn fatg memoria el survetsch divin da quels treis sogns marters. Igl emprem ei sogn Timoteus ch’ei naschius ad Antiochia. Bein istruius en la teologia eis el lu daventaus in devozius e perdert augsegner. Suenter gronda lavur en sia patria, serenda il sogn a Ruma tier papa Melchiades e viseta cun devoziun las fossas dils sogns apostels. Ussa entscheiva el cun sia innocenta veta e sontga ductrina a confortar ils persequitai, per ch’els stettien statteivels alla cardientscha da Cristus. Cheutras ha Timoteus era convertiu e menau biars pagauns tier la glisch dil sogn evangeli. Cun missiunar duront 15 meins per Ruma entuorn, vegn il sogn arrestaus e turzegiaus groppamein dil prefect Tarquinius. Nunvulend el calar da confessar Jesus Cristus per ver Diu, lai quei tiran treis ga bastunar il sogn e fierer el en perschun. Suenter vegn Timoteus menaus ora tiels fauls dieus per far adurar quels. Il sogn spiritual che sbetta quellas figuras diabolicas, vegn danovamein torturaus e silsuenter senza cumpassiun scavazzaus ils 22 d’uost digl onn 312. La virtuusa dunna Teodora satiara il sogn tgierp sper la fossa da sogn Paul apiestel. Il secund da quels treis sogns marters ei sogn Hippolit, in um da gronda sabientscha e ductrina. Sco uestg dall’Arabia scriva el biars nizeivels cudischs pil beinesser dalla sontga cardientscha e converta pli che 30‘000 pagauns tier Cristus. Suenter ver dau reglas alla baselgia episcopala e provediu quella cun buns pasturs, serenda el a Ruma per visitar las fossas dils sogn apostels Pieder e Paul e per plidar cun papa Calixtus I sur dils pugns da cardientscha. Vesend il papa la gronda savida da Hippolit, lai el buca pli turnar il sogn egl Orient e tschenta el per uestg da Porto Romano, in liug sper Ruma. Cheu ha Hippolit purtau schi bein il sogn evangeli al pievel che mellis pagauns han embratschau la cardientscha da Cristus e seschau battegiar. Ulpianus, in grond minister digl imperatur Alexander Severus e criu inimitg dils cristians, ha cun tradiments fatg pigliar Hippolit, ligiar peis e mauns e neghentar el en in profund puoz. Quei ei daventau ils 22 d’uost digl onn 229. Fideivels han da notg priu il tgierp ord l’aua e satrau damaneivel en tutta honur. Sco tierz marter vegn numnau il sogn Sinforian, naschius entuorn igl onn 165 ad Autun en Frontscha. Il bab Faustus, rehs e da gronda pietad, deva quartier a tutta glieud jastra. Il marcau denton fuva pagauns. La glieud veva l’isonza da far savens grondas fiastas per honorar lur dieus. Tier talas caschuns serimnavan ils pagauns avon la figura da Cibelle ch’els miravan per la mumma da tuts dieus. Cheu vegneva comess publicamein scandalusas ovras e giugs. Sinforian ch‘ei per schabetg cunfrontaus cun quei, ha giu tal displascher ch’el ha buca pudiu quescher e clamau tut da vilau: Eis ei pusseivel che persunas intelligentas san esser schi tups da far da quei? Il pievel che ha udiu ses plaids, ha teniu el per inimitg e sbittader da lur dieus. Il giuven vegn menaus avon il guvernatur dil marcau ed interogaus. Sinforian dat perdetga dil sulet ver Diu e vegn perquei gheslegiaus e fiers en ina stgira perschun. Suenter entgins dis defenda il sogn giuven danovamein avon il derschader la honur dil sulet ver Diu. Perquei vegn el condemnaus alla mort tras la spada. Da quella sentenzia selegra Sinforian. El engrazia a Diu e roga il tschiel da conceder a ses cumpatriots pagauns la glisch dalla vera cardientscha. Ils 22 d’uost digl onn 273 sin via tier la execuziun, auda il sogn giuven sia mumma a clamond da buca temer da brattar la veta temporala cun la beadadad perpetna. Sinforian peglia curascha e porscha al hentger siu tgau. Ils cristians san discusamein satrar il sogn tgierp damaneivel d’ina fontauna. Sin intercessiun da sogn Sinforian retscheivan leu biars cristians e pagauns grondas grazias.
Abramo
Il garmadi e nauschira prefect Tarquinius ha oz biars successurs. 😡