Clicks417

Sogn Macari, patriarc d’Antiochia

pdf: cheu l'entira historia Sogn Macari, patriarc d’Antiochia Ils 10 d’avrel: Sogn Macari, patriarc d’Antiochia Sogn Macari ei naschius ell‘Armenia da nobels e buns geniturs catolics. Da batten ha …More
pdf: cheu l'entira historia
Sogn Macari, patriarc d’Antiochia
Ils 10 d’avrel: Sogn Macari, patriarc d’Antiochia


Sogn Macari ei naschius ell‘Armenia da nobels e buns geniturs catolics. Da batten ha el retschiert il medem num sco siu padrin, igl arzuestg d’Antiochia. Suenter paucs onns ha il prelat priu il figliol tier el, per saver schar studegiar ed educar el en la tema da Diu. Macari daventa suenter il studi in virtuus e perdert augsegner. Igl arzuestg fuva denton vegls e malsauns. El cloma spirituals e pievel e tuts ein cuntents d‘eleger Macari per niev pastur. Era sco niev eligiu uestg resta el humiliteivels e plein buontad e carezia viers paupers e malsauns. El sez mortificava siu tgierp cun grondas penetienzias. Sias oraziuns teneva el adina cun tala devoziun ch’el saveva buca dir il Babnos senza bargir. Perquei purtava el adina in stratsch per schigentar las larmas. Cun quel ha il sogn lu era medagau miraculusamein malsauns ed impedi. Muort las biaras miraclas ludava e stimava il pievel quei bien pastur. Denton per fugir il prighel da curdar en vanagloria, surdat Macari siu guvern ad in bien spiritual e banduna discusamein Antiochia per serender a Gerusalem. Leu leva el restar nunenconuschents, mo il patriarc da Gerusalem ha enconuschiu el. Sin quei eis el buca setenius si el marcau, mobein ius per la Tiarasontga entuorn a visitar ils loghens sogns. Aschia saveva el plidentar pagauns e gedius e converter biars tier la cardientscha catolica. Quei ha vilentau ils nuncartents zun fetg ch’els han pigliau e maltractau sogn Macari sin da tuttas modas. Per beffergnar ses priedis e sias ductrinas, han ils persequitaders ligiau il perschunier en crusch sil plaun dalla perschun cun sugas e fermau quellas cun grondas guottas vid la tiara. Quei sufrir per amur da Diu, ha purtau ad el ventira. In aunghel cumpara en gronda clarezia ed animescha il sogn da sefidar dalla protecziun divina. Lu eis el staus stulius ed il sogn steva cheu sauns e libers dils sughets. El vesa la perschun aviarta, banduna quella senza dubis, engrazia a Diu e sepresenta puspei avon ses persequitaders. Tala miracla ha muentau biars nuncartents ch’els rogan da vegnir instrui per saver retscheiver il sogn Batten. Il sogn ha fatg aunc autras miraclas che han convertiu ses ulteriurs inimitgs. Denton ein ses parents vegni neu d’Antiochia per sfurzar Macari da turnar en sia patria. Vulend duvrar la forza ein quels daventai tschocs. Els sehumilieschan, rogan per perdun ed il sogn ha cun la crusch ch’el purtava enstagl dil fest, turnentau ad els vesida e sanadad. Suenter quei ei il sogn patriarc serendius en la Germania per esser nunenconuschents. Mo nua ch’el mava, palesava Diu sia sontgadad cun schar daventar da tuttas sorts miraclas e tras quei vegneva Macari tenius per in aunghel dil parvis. Finalmein suenter biars e liungs viadis ei il sogn patriarc sefermaus en la claustra da sogn Bavone a Gand, in marcau dalla Flandria. Negliu saveva el restar nunenconuschents e perquei vuleva el puspei turnar anavos en sia patria nativa. Mo Diu ha tarmess ina gronda febra sur da siu survient. Da quei temps regeva la muria a Flandria e contuorn e raffava naven bia glieud. Sogn Macari ha rugau Diu da prender naven quei castitg. Sia oraziun ei vegnida exaudida ed il tschiel ha schau saver che la muria cali si suenter sia mort, quei ch’ei lu era schabegiau cuort sisu. La muria ha medemamein taccau il sogn patriarc ed el miera sontgamein igl onn 1012 en la claustra da sogn Bavone e sinquei ei la pestilenza tschessada. Il sogn tgierp ei vegnius satraus en la grotta sut la caplutta da Nossadunna. Las miraclas daventadas han promoviu la devoziun tiel sogn che vegn venetraus per patrun dalla muria.