Sogn Sanctulus, spiritual e confessur.

pdf: cheu l’entira historia Ils 22 da december: Sogn Sanctulus, spiritual e confessur

Sogn Sanctulus ha viviu dil temps da sogn papa Gregori il grond. Sias bialas vertids han menau il giuven tiel stan sacerdotal. Da quei temps ein ils Langobards dai en l’Italia, ruinau marcaus e tiara e teniu ils cristians per sclavs. In di che quels tirans levan squitschar ora ieli d’uliva, mo dumignavan buca, ei il spiritual Sanctulus vegnius neutier cun in vischi per prender ieli. Ils pagauns han catschau naven il spiritual cun aviras, cartend ch’el fetschi mo beffas. Sanctulus ha l’autra ga rugau per ieli, denton pli resolut. Mo vesend ch’ils Langobards vegnevan aunc pli nauschs, ha el fatg purtar neutier aua, benediu e dersch quella sin las ulivas. Igl ieli ei currius abundontamein ch’els han saviu emplenir tut lur vischals ed era quel da Sanctulus. Sin quei ei il devozius augsegner vegnius honoraus e stimaus dils tirans. Quels medems Langobards vevan denter auter era barschau e ruinau la baselgia da sogn Luregn a Norcia, in marcau da Spoleto. Il sogn ha ussa priu a mauns da baghegiar si quella. Ei regeva in temps da gronda scartezia e fomaz. Il sogn spiritual fa gronds quitaus co dar da magliar a ses luvrers. In di ha el daveras survegniu negin paun. Ils luvrers pitevan fom e pudevan buca pli luvrar. Il survient da Diu consolescha e dat la ferma speronza che Diu vegni gleiti a proveder els. Cun ir a rugar per vivonda, eis el vegnius tier in fuorn ed anflau lien in grond paun. Damai ch’il paun ha anflau negin patrun, ha Sanctulus salvau quel per ses luvrers. Scadin ha saviu magliar ton sco el leva e tuttina vonza ei dapli paun che quei ch’el veva mess sin meisa. Il sogn lauda Diu e dat l’auter di puspei da quei paun a sia glieud. Puspei han tuts giu avunda e danovamein eis ei vanzau dapli ch‘il di avon. Cun quei miraculus paun ha ils sogn spiritual saviu per diesch dis dustar la fom a biara glieud. In auter fatg ei stau ch’in diacon ei vegnius mess en perschun e sentenziaus alla mort. Sanctulus va tiels barbars e roga d’astgar pertgirar quei innocent diacon. Ils Longobards lubeschan quei, denton cun la cundiziun ch’el stoppi murir per quel, sch‘el laschi fugir il perschunier. Il sogn um ha bugen acceptau quella proposta. Entuorn mesanotg ha Sanctulus leventau il perschunier e vuliu ch‘el fuigi. La damaun sisu vegn il sogn spiritual sentenziaus alla mort cun esser scavazzaus. Grond pievel serima ora sin la plazza per mirar la scavazzada. Sanctulus ura tier Diu e tier siu car patrun sogn Gion Battesta. Cun fatscha legreivla porscha el siu culiez al carnifex. Cura che quel vul smenar la frida, cloma Sanctulus: O sogn Gion, retegn la spada! Il carnifex resta cun siu bratsch schiraus ell’aria. Ils presents peglian tema e vulan ch’el vegni libers dil castitg. Quei ei lu era daventau, denton mo cun metter giu il sarament da mai pli far murir in cristian e da dar als perschuniers la libertad. Era quei han ils Langobards concediu al sogn. Aschia ha quei survient da Diu buca mo manteniu en veta sesez, mobein era dau sia carezia al proxim concarstgaun cun offerir sia veta. In temps suenter ei sogn Sanctulus morts pleins da vertids e merets cun gudignar la gloria perpetna dil parvis.