Sontga Dorothea, purschala e martira.

pdf: cheu l’entira historia
Ils 6 da fevrer: Sontga Dorothea, purschala e martira

Sontga Dorothea ei naschida ord ina nobla e pietusa famiglia da Cesarea en Capadocia. Gia ses geniturs havevan spons lur saung per amur da Cristus. Las vertids da quella purschala tarlischavan en Cesarea da grond smarvegl. Cun giginar, far oraziun e mortificar siu tgierp leva ella pertgirar la flur da siu purschaladi ch’ella veva gia da giuvnetta unfriu si a Diu. Aschia vegneva ella dapertut numnada la spusa da Jesus Cristus.
Saprizius, il guvernatur dalla Cesarea ch’er inimitg dils cristians ha prest udiu che Dorothea promovi cun siu exempel la religiun catolica e sminueschi cheutras la veneraziun da lur dieus. El fa menar ella avon siu tribunal e vul ch’ella sacrificheschi a lur dieus. En tutta mudestadad e senza tema declara Dorothea ch’ella obedeschi a Diu pli che ad in carstgaun che camondi caussas che cunterfetschien als condaments da Diu. Sin las renfatschas e smanatschas da far murir ella, rispunda la dunschala: „Jeu temel ni peinas ni mort e sun paregiada da dar a tuts exempel, sinaquei che scadin sappi emprender da star fideivels al sulet ver Diu e da buca temer las smanatschas d’in carstgaun. Pertgei las peinas da quest mund ein cuortas, mo quellas digl uffiern ein perpetnas.
Vesend Saprizius che ses plaids fan negin effect, lai el metter la sontga vid il tgierl e mudergiar ella crudeivlamein. Per tema dils turments eran las duas soras Christa e Calista curadas, snegau Christus ed adurau ils fauls dieus. A quellas ha Saprizius surdau la sontga ed empermess da far ellas rehas, sch’ellas damognien da volver Dorothea. Mo igl ei daventau tut il cuntrari. Dorothea ha cun sia marvigliusa faviala saviu far clar ad ellas lur falliments e metter ora ton bein la misericordia da Diu che Christa e Calista ein puspei turnadas tier la cardientscha da Christus. Il tiran che auda quei, lai en sia ravgia barschar las duas soras vivas, ligiadas dies encunter dies. Cun plascher han ellas suffriu generusamein il marteri el fiug e rugau Diu da retscheiver quella penetienzia per satisfacziun dils puccaus commess. Lu vegn Dorothea messa sil tgierl. Las stermentusas peinas suffreva la spusa da Cristus cun fatscha ton legreivla ch’il tiran leva saver pertgei ella seigi schi ventireivla. La sontga rispunda: Jeu hai convertiu tier Diu duas olmas che fan ussa fiasta culs aunghels en tschiel, nua che jeu hai era la speronza da gleiti puder vegnir. Mo pli che las peinas carschevan e pli ch’ella carscheva el spért. Da quei vegn il derschader tut confus e dat la sentenzia da scavazzar Dorothea. Da quella sentenzia selegra ella, lauda Diu e di: Jeu engraziel a Ti, o Segner, amitg dallas olmas che has clamau mei da vegnir en tiu parvis tier las nozzas dil tschut senza macla. Quels plaids ha igl advocat Teofilius udiu e fa beffas cun ella schend: Tarmetta a mi zacons meils e rosas ord il curtgin da tiu spus. La sontga rispunda: Gie, quei jeu vi tarmetter. Lu semetta ella en schanuglias …