Sogn Meinrad, marter.

pdf: cheu l’entira historia
Ils 12 da fevrer: Sogn Meinrad, marter

Sogn Meinrad ei naschius igl onn 805 a Sulgau en la Germania. Gia cun tschun onns ha il bab plazzau Meinrad en la claustra da Reichenau. Cun 25 onns ha el retschiert l‘ordinaziun sacerdotala e restaus leu pader Benedictin. Cun siu exempel eis el en buca ditg daventaus decan. Suenter in temps eis el cun lubientscha da siu avat seretratgs el solitari sigl Etzel damaneivel da Rapperswil. Cun agid d’ina buna vieua ha el baghegiau leu ina hetta cun ina caplutta e restaus leu siat onns, survend sulettamein a Diu. Savens visitava il pievel sogn Meinrad e dumandava per cussegls. Da quella mulesta ha el vuliu fugir ed ei seretratgs en in liug aunc pli bein serraus denter ils cuolms. Quei liug che senumna oz Nossadunaun, senumnava da gliez temps Uaul stgir. Cheu ha sogn Meinrad baghegiau igl onn 838 ina camona cun ina caplutta en honur da Nossadunna, la quala el numnava sia mumma e patruna. Cheu eis el ussa sefermaus per il rest da sia veta cun viver fetg stregn e seconversar sulettamein cun Diu. Quei displascheva als spérts infernals ed els cumparevan al sogn en macortas figuras che urlavan, tgulavan e sgargnevan, sco sch’els lessan scarpar el. Savens fuva il diember da quels demunis schi gronds ch’il sogn pudeva strusch veser la clarezia dil di. Pli fetg ch’ils demunis luvravan e pli fetg ch’el urava. El serecumandava a Diu che ha lu tarmess in aunghel per spuentar quels nauschaspérts.
Sogn Meinrad vegnevca puspei visitaus dils cartents. Denter quels fuva era in confrar da sia claustra. Cun quel ha sogn Meinrad discuriu ditg e liug. La sera han els urau il cumplet e semess a ruaus. Suenter ina cuorta sien ei Meinrad levaus en pei ed ius en sia caplutta per far oraziun. Per marveglias tgei Meinrad fetschi, ei siu confrar era levaus ed ius sin porta-caplutta. Cheu vesa el in aunghel dil Segner sper il sogn che urava cun el. Lu ei quei spért celestial vegnius tiel confrar e scumendau da palesar quei ch’el hagi viu, aschiditg che sogn Meinrad vivi. Suenter stusch 26 onns ei Diu cumparius ad el duront la celebraziun dalla sontga messa e fatg da saver ch’el hagi aunc quei di da vegnir marterisaus. Il sogn finescha la sontga messa e sefiera giu avon igl altar cun la fatscha sin la tiara. En quei mument rumpan dus scrocs neuaden e greschan: U daners ni la veta. Sogn Meinrad ha sentiu lur finamira, tratg ora sia rassa ed il caput e detg: Prendei quei da mei e cura che vus veis cumpleniu vies intent, sche envidei suenter mia mort duas candeilas e tschentei ellas sper miu tgierp, ina si da tgau e l’autra giu da peis. Lura fugi spertamein. En tutta gretta han ils dus morders bastunau il sogn e serrau giu al moribund la gula, entochen ch‘el ei spartius. Sia olma han dils aunghels purtau a tschiel tier la cumpignia dils sogns marters. Quei fuva ils 21 da schaner 863. Il miert han ils scrocs lu mess en siu letg e lu fugi senza haver sblundergiau la caplutta. Ils dus tgapers che sogn Meintad veva …