Sogn Remigi, uestg e confessur.

pdf: cheu l’entira historia
Ils 1 d’october: Sogn Remigi, uestg e confessur

Sogn Remigi ei naschius igl onn 436 a Laon sper Rems, in marcau en la Frontscha. Ses geniturs Emilius e Cilinia eran nobels e rehs denton fetg virtuus. Da quei temps fuva la cardientscha catolica en schliet stan muort la scandalusa veta da spirituals e seculars.
Il devozius eremit Montanus urava di e notg tier Diu da far misericordia e buca schar stinschentar la glischa dalla cardientscha catolica. Ina notg enten far oraziun, auda el ina vusch che lai saver che Diu hagi tedlau sias oraziuns e vegli far misericordia cul pievel travigliau. Cilinia vegni a parturir in fegl che duei vegnir numnaus Remigius e che vegni a consolar il reginavel dalla Frontscha.
Consolaus da quels plaids va Montanus tier Cilinia e siu mariu per palesar quei ch’el haveva udiu. Era sch’els han dubitau, sco pli baul Zacharias ed Elisabeth, ei tut quei che Montanus veva profetisau iu en vigur.
Els han tratg si Remigius cun diligenza ed en tema da Diu. Aschia era Remigius daventaus in virtuus affon che viveva ina sontga veta. Per fugir dils prighels dalla giuventetgna eis el seretratgs en in liug da siu persei e viviu leu entochen ch’el ha 22 onns, cun urar, meditar e studegiar. Lura ei Gennadius, uestg da Rems, morts e gl’entir pievel han eligiu Remigius per lur uestg.
Quei ch’el metteva avon cun plaids, viveva el cun siu exempel. Encunter ils puccaus e vezis perdegava el fetg scharf. Cun far l’enzenna dalla sontga crusch ni ina cuorta oraziun, deva el la vesida als tschocs, la sanadad als malsauns e la veta als morts. Denton la pli gronda miracla ei stada, da saver converter tier Cristus il retg Clodoveus cun tut siu reginavel.
Cun siu exempel ha el tratg bunamein tut il pievel franzos sut la bandiera da Cristus. Il retg cun sia famiglia ed aunc cun pli che 3‘000 cavaliers e ministers dil reginavel, ein vegni battegiai da sogn Remigi sin la fiasta da Nadal. Muort la gronda fuola che vegneva battegiada e cresmada, ei il sontg Ieli ius alla fin. Gest lu ha il tschiel provediu il sogn miraculusamein cun in ieli celestial. Ina columba alva sco la neiv cumpara cun in guoter da glas pleins d’in miraculus ieli e balsam e tschenta quel enta maun a sogn Remigi e sgola naven.
Remigi battegia e creisma entochen alla fin cun quei sogn Crisam purtaus giu da tschiel. Quei glas vegn numnaus: la sontga Ampulla ed ei conservaus a Rems. Cun quei ieli ch’ei semantenius entochen oz schi bein, ein era ils retgs dalla Frontscha vegni unschi.
Remigius veva survegniu igl avis da Diu ch’ei vegni ina gronda scartezia sur dalla Frontscha. Per gidar ils paupers veva el rimnau ensemen bia garnezi. Entgins dils Franzos suspectavan ch’il sogn savessi daventar in marcadont e cul temps vender quel cun grond gudogn.
Ord spira scuidonza han els dau fiug il magazin da sogn Remigi. Vesend igl uestg che tut fuva gia consumau dallas flommas, ha el detg cun bucca rienta: Il fiug ei adina buns per ils vegls; ins sa silmeins sescaldar vid quei ch …