Emblida mai!

E nossa veta dat ei dis,ch'in sa mai emblidar,
sfundrai aschi afuns el cor sco scazis en la mar.
Els dorman cheu sco striunai,mo emblidar els san ins mai.

Ti sas fors'aunc seregurdar co ti eis s'entupaus
cun Diu en tia oraziun,e lu eis el vargaus.
Sche quels fastitgs ein er'zuppai,na,emblidar sas ti els mai.

Cu ha l'emprem'amur bitschau discusamein tiu cor
ed ei semessa spera tei sco tiu pli grond tresor?
Quels temps ein gia daditg spirai,mo emblidar els sas ti mai.

Curios fuss ei sche la dolur fuss ida sper tei vi,
vess en la veta mai marclau tiu cor cun siu marti.
Quels dis pon esser bein vargai,mo emblidar sas ti els mai.

Lai esser il vargau vargau e mir'egl avegnir.
Il cor human enquera gie il clar e buc il stgir.
Da Diu nus essan carezai.
Quei,car amitg, emblida mai!

Giusep Durschei