Sogn Gion da Matha, confessur.

pdf: cheu l’entira historia
Ils 8 da fevrer: Sogn Gion da Matha, confessur

Sogn Gion da Matha ei naschius a Falcons, in liug dalla Provenza en Frontscha. Sco perdert giuven ha el studegiau e doctorau a Paris en la teologia. Digl arzuestg da Paris ha el retschiert l’ordinaziun sacerdotala e daventaus magister dalla giuventetgna che studegiava. Duront si’emprema sontga messa en preschientscha digl arzuestg ei in aunghel cumparius tut en alv che purtava sin siu pèz ina crusch en tgietschen-blau e che teneva la bratscha en crusch sin ils tgaus da dus sclavs che stevan da mintga vart. In da quels pareva in cristian e l’auter in maroccan. Entras quella visiun ha il sogn enconuschiu che Diu hagi destinau el per spindrar e liberar ils sclavs ord ils mauns dils nunfideivels. Per contonscher forza ed agid da Diu en sia clamada, ei il sogn sacerdot serendius en in eremitadi. Menaus da Diu s‘entaupa sogn Gion leu cun sogn Felici de Valois che habitava gia daditg en quei liug. Els ein seconsolai e fatg ina sontga allianza spirituala, cun viver leu ensemen duront treis onns en oraziun e meditaziun. In di duront lur oraziun sepresenta in tschierv avon els cun ina crusch cotschna-blaua denter la corna. Sogn Felici sesmarveglia da quei, mo sogn Gion raquenta da sia visiun ch’el veva giu duront sia emprema sontga messa. La notg ha Diu avisau els treis ga en siemi, quala fussi sia voluntad. A Ruma tier papa Innocenz III., damondan els per lubientscha da fundar in uorden per spindrar e liberar sclavs. En lur discuors seregorda il papa dalla medema visiun duront la sontga messa el Lateran, semeglionta a quella da sogn Gion a Paris en la capluta digl arzuestg. Sin quei fatg misterius ha il papa immediat acceptau e confirmau il niev uorden dalla Sontgissima Trinitad e numnau el igl uorden dils Trinitars. El ha vuliu ch’ils religius da quei uorden portien in habit alv cun la crusch en tgietschen-blau. Sin quei ein ils dus fundaturs turnai en Frontscha e baghegiau lur emprem convent egl uestgiu da Mels. Sogn Felici ei restaus leu sco guvernatur, ferton che sogn Gion da Matha ei turnaus a Ruma. Papa Innocens ha lu regalau ad el la baselgia da sogn Tumaisch sil cuolm Celio cun il spital. Da cheu anora ha la sontga ovra da spindrar sclavs priu sia entschatta. La pli gronda part dalla Spagna piteva da quei temps sut il giuv dils Saracens. Sogn Gion plein premura apostolica, ei ius en Spagna, solidarisau cul retg maroccan ed era muentau ils cors d’auters retgs, prencis e cartents da far grondas almosnas per saver liberar ils sclavs. Puspei turnaus a Ruma, ha el cuntinuau leu cun sia sontga ovra. Per survegnir la caschun da vegnir marterisaus, eis el sez serendius ell’Africa. Leu eis el vegnius bastunaus e maltractaus cun fridas, mo Diu ha vuliu ch’el tuorni culs sclavs da Tunesia a Ruma. Ils barbars vevan schau ad els ina schliata barca senza tendas, per ch’il sogn e ses sclavs spindrai mondien sutsura sin la mar. Enstagl dallas tendas ei il sogn sesurvius …