Sontga Gada, purschala e martira.

pdf: cheu l’entira historia
Ils 5 da fevrer: Sontga Gada, purschala e martira

Sontga Gada ei stada ina dallas quater principalas purschalas martiras digl Occident. Cura che la persecuziun ha giu entschiet, viveva ella a Palermo. Denton morta dil marteri eis ella a Catania. En ses giuvens onns haveva la biala, nobla e reha giuvna dalla Sicilia fatg il ferm vut da prender negin auter per spus che Jesus Cristus, al qual ella fuva sempermessa.
Cura che Quinzianus, il crudeivel pagaun e guvernatur dalla Sicilia ha enderschiu con reha e biala che Gada seigi, eis el sedecidius da prender ella per spusa ed el lai clamar la giuvnetta a Catania. Ladinamein ha ella saviu che Diu vegli dar ad ella la caschun da vegnir marterisada. Perquei ura ella ferventamein e serecamonda a siu divin spus, avon che ir tier Quinzianus. Per arrivar tier sia schliata finamira, ha el lu plazzau la sontga dunschala per 30 dis tier ina malhonesta dunna che veva sezza 5 bialas feglias che fuvan medemamein schi carnalas sco ella. En quella tschuffa cumpignia havess Gada giu da piarder tut turpetg, lu la carezia tier Cristus e sco davos era la cardientscha cristiana. Da tut quellas malezias diabolicas fageva ella negina feda e sco sch’ella udess ni vesess nuot. Mo in di ha Gada tuttina svidau ora siu cor e turzegiau quella turpegiusa femna per ministra dil satan e detg cun clars plaids ch’ella untgeschi ella sco da untgir il satan. Cun agid da siu divin spus vegni ella mai a piarder sia castiadad e daventar malfideivla.
Suenter quels 30 dis lai Quinzianus puspei clamar ella e cheu entscheiva siu marteri. Cun dar ad ella las lètgas u da snegar Cristus ni da murir sut grondas peinas, vegn ella messa en perschun. Cheu roga ella Diu per la grazia da puder contonscher la cruna dil marteri. L’auter di, cura ch’ella vegn menada avon il tiran, resta ella danovamein ferma sco in grep e renfatscha al tiran sia crudeivladad e di ad el cun tutta curascha ch’ella seigi semtgada da schar metter a frusta siu tgierp per amur da siu dultsch spus Jesus Cristus. Sin quella risposta fa il crudeivel tiran ligiar la dunschala vid il tgierl e torturar ella sin da tuttas nunpusseivlas e turpegiusas modas. Suenter quels sgarscheivels turments lai il tiran puspei metter la sontga en perschun cul scamond da dar vivonda e medicaments. Strusch messa en la stgira perschun, cumpara sogn Pieder ad ella en semeglia d’in bi um vegl che seporscha da medegar sias plagas. Sontga Gada che saveva buca tgi che quei fussi, ha rispundiu ch’ella hagi aunc mai duvrau medischinas vid siu tgierp ed ella hagi era buca el senn da schar medegar. Jesus Cristus vegni a metter cun in soli plaid tut las caussas en siu esser. Uss ei sogn Pieder sedaus d’enconuscher e detg: Jeu sun in apiestel da Cristus; hagies negina tema e negins dubis; pertgei jeu sun tarmess da Diu per dar a ti la sanadad. Sogn Pieder ei sin quei staus stulius. La sontga, medegada dallas plagas, aulza siu spért tier Diu ed excloma: „O Segner Jesus, …