Sogn Vincenz ni Vintschegn, marter.

pdf: cheu l’entira historia

Ils 22 da schaner: Sogn Vincenz ni Vintschegn, marter

Sogn Vincenz che fuva in niebel Spagnol, ei naschius ad Osca e tratgs si a Saragossa. El duess esser staus in nevs da sogn Luregn. Da pign ensi fuva Vincenz fetg enclinaus tier il bien ed el carscheva en las vertids, ch’igl uestg Valerius da Saragossa, ha lu ordinau el diacon. El veva da perdegar il sogn evangeli, perquei che sogn Valerius pudeva, muort l’aulta vegliadetgna buca pli plidar. Dioclezian e Maximian, dus crudeivels imperaturs che regievan da quei temps, han tarmess il crudeivel Dacianus sco president dalla Spagna. Quei tiran ha immediat entschiet cun la tirania, e marterisau biars catolics. Igl uestg Valerius ed il diacon Vintschegn, ch‘eran duas fermas petgas per ils cristians, ein vegni pigliai e menai a pei en cadeinas a Valencia. Suenter quei stapaz d’in viadi, ein els vegni serrai en ina tschuffa e stgira perschun. Suenter zacons dis ha Dacian fatg menar avon quels dus perschuniers. Il tiran fa la damonda, sch’els veglien ussa adurar lur dieus? Sogn Vintschegn passa anavon e di: Dacian! Tes dieus salva per tei ed adura ti tez quels. Nus cristians savein ch’els ein la lavur da quels che han construiu els. Nies Diu ei quel che ha scaffiu tschiel e tiara ord nuot, e regia marvigliusamein tuttas caussas. Quei ei il sulet e ver Diu! Per amur da quel lein nus pitir e dar la veta per defender sia cardientscha. Dacian tut confuss, lai immediat bandischar igl uestg Valerius ord la tiara. Vintschegn denton camonda el da torturar. Immediat seglian ils sbiers a dies al sogn, train ora la vestgadira e stendan el sil tgierl. Dacian mo fagiend beffas scheva: „Ti duessas sacrificar quei a nos dieus e lu vegns ti deliberaus da quellas peinas.“ Era il sogn marter rieva e scheva cun fatscha sereina: Che ti sappies, Dacian, jeu hai gia daditg garegiau e spitgau sin talas peinas. Jeu hai il desideri da murir per quel ch’ei morts per mei vid la crusch.
Il tiran miez orda senn fa aunc dapli bastunar e gheslegiar il sogn. Per stunclentar il cor da sogn Vintschegn, ha Dacian fatg prender il sogn giu dil tgierl e stender el sin in rost da fier cun in grond fiug suten. Ins sa buca descriver tgei torturas che nies sogn piteva, mo el urava e suffreva tut quei, sco sch’el fuss en in letg da rosas. Vesend il tiran che tuts turments pudevan buca far murir el, lai el puspei metter il torturau en perschun cun plein scalgias da glas e da tiara-cotga giun plaun, per ch‘el resti torturaus cuntinuadamein. Cheu ha ina glisch sclariu la perschun, aunghels ein cumpari e derasau ina marvigliusa odur. La guardia tema e vul fugir. Sogn Vincens di ad els da buca fugir, mobein entrar ed era guder quella consolaziun che Diu ha hagi termess ad el. Els dueien era emprender d’enconuscher il grond e buntadeivel Signur, al qual el surveschi. Ferton che la guardia mava tier Dacian, plaiden ils aunghels tiel sogn ed annunzian ad el sia mort. Tut quei ch’era schabegiau en perschun vegn ad ureglia …