02:55
La veta d’in auter sogn Valentin, spiritual e marter. pdf: cheu l’entira historia La veta d’in auter sogn Valentin, spiritual e marter Ils 14 da fevrer festivescha la Baselgia la fiasta en memoria da …Daplü
La veta d’in auter sogn Valentin, spiritual e marter.

pdf: cheu l’entira historia
La veta d’in auter sogn Valentin, spiritual e marter

Ils 14 da fevrer festivescha la Baselgia la fiasta en memoria da sogn Valentin, spiritual e marter. Quei sogn fuva entuorn igl onn 279 muort sia ductrina, sabientscha e sontgadad fetg stimaus e honoraus a Ruma. Igl imperatur Claudius il secund fuss bugen sefatgs siu amitg, mo damai ch’il sogn perdegava e declarava la verdad dils misteris dalla cardientscha cristiana, eis el daventaus siu grond inimitg. Suenter in liung discuors ha Claudius surdau sogn Valentin al derschader dil marcau per far il process encunter el. Il sogn spiritual vegn fermaus en cadeinas e menaus avon il derschader Asterius. Leu ha il sogn sco emprem rugau Diu per amur dil custeivel saung da Cristus, da vuler conceder a quella casa la glisch dalla vera cardientscha. Asterius auda l’oraziun e sesmarveglia che quei Cristus duessi esser ina glisch. Suenter entginas beffas vul il derschader veser in mussament dil sogn e di: Jeu hai cheu ina feglia ch’ei gia dapi dus onns tschocca. Sche quella survegn la vesida tras la glisch da Cristus, sche vi jeu crer e far tut quei che ti has bugen. Sogn Valentin ferms da cardientscha e fidonza enten Diu, lai menar neutier la feglia tschocca, metta duront urar ils mauns sur ils egls dad ella e la dunschala vesa cumpleinamein. Asterius che fuva leu presens cun sia dunna e l‘entira casada, ein stai illuminai da quella miracla e tuts ein seconverti, seschau instruir e battegiar da sogn Valentin. Da quei ha igl imperatur survegniu novas e fetg sesmarvigliaus dalla forza da Cristus ed il pli bugen havess el era liberau sogn Valentin da ses auters derschaders. Mo per tema d’enqual sgurdin ha el fatg murir Asterius cun tut sia famiglia. Sogn Valentin denton ha el surdau ad auters derschaders che han mess el en perschun e lu schau bastunar el savens e crudeivlamein. Alla fin han els scavazzau il sogn e quei ils 14 da fevrer digl onn 281. Siu sogn tgierp ha ina dunna devoziusa satrau en quei medem liug dil marteri che purtava il num Flaminia, nua ch’ins ha silsuenter baghegiau leu ina baselgia en honur da sogn Valentin.