Sogn Flep Benizzi, confessur.

pdf: cheu l'entira historia / Sogn Flep Benizzi, confessur

Ils 23 d’uost: Sogn Flep Benizzi, confessur

Sogn Flep Benizzi ei naschius ils 15 d’uost 1233 a Florenza. Gia el best senteva la mumma che lur affon vessi da daventar in grond sogn. Era paucs meins suenter la naschientscha han ils geniturs saviu far per senn che lur affon seigi in special regal dil tschiel. Els lain ussa muncar neginas breigias d’educar e studegiar il pietus Flep che urava savens tier Nossadunna. Ses studis da filosofia, teologia e medischina fa el per part en sia patria. A Paris ed a Padua siara el giu il studi cul doctorat. Turnaus puspei a Florenza, roga el savens Niessegner e Nossadunna da gidar el tier quei stan, nua ch’el sappi survir il meglier a Diu. Entras ina visiun da Nossadunna ha il bien Flep claramein capiu ch’el hagi d’embratschar la ductrina dils Servits da Maria. Beinmarvegl va el sil cuolm Senari, treis uras naven da Florenza tiel hospezi da quels paders. Cun grond legherment astga el retscheiver il habit e sto gl’emprem survir alla claustra sco fra. El fuva hortulan, cuschinier, caluster, insuma dapertut nua ch’ei fageva da basegns. Neginas lavurs eran ad el malemperneivlas, tut fa el cun plascher: El gigina taluisa ch’ins sesmarveglia ch’el sappi aunc viver. Per saver zuppentar ses gronds talents e studis, seretrai Flepp cun lubientscha dils superiurs en ina grotta. Cun el veva el priu in cruzifix ed ina statua da Nossadunna. Ses superiurs han beingleiti encurschiu sia virtuusadad e cloman el ord siu eremitadi. Flep vegn ussa ordinaus augsegner e surpren il guvern dalla claustra da Siena. Igl onn 1267 vegn el encunter sia veglia eligius superiur general digl uorden dils Servits da Maria e derasa quel lunsch entuorn. Era el sez va ora el mund a perdegond il sogn evangeli e quei buca senza stuer pitir aviras, gomias, strappaz e schizun fridas. A Viterbo regala sogn Flep sia rassa ad in pauper leprus e medegau quel da sia malsogna. Ils cardinals che eran radunai a Viterbo, han udiu da quella miracla ed ein secunvegni da dar la tscharna a Flep Benizzi per daventar successur da papa Clemens IV. Udend quei, fui il sogn pader sils cuolms da Siena e sezuppa en ina stgira tauna entochen che Gregori X ei staus mess papa. Leu senutreva el da jarvas ed aua. Inaga che aua muncava, ha el cun fidonza en Diu pitgau cul fest sin la tiara ed aviert leu ina fontauna. Quella vegn aunc oz numnada sil cuolm Montagnado il bogn da sogn Flep. Havend rugalau bein siu uorden, vegn el taccaus da dina gronda febra. Siat dis pli tard vegn Flep provedius culs sogns sacraments. El damonda per il cruzifix, smacca quel vid siu cor e recamonda siu spért a Diu ed a Nossadunna. Cun in dultsch suspir passa el beadamein ord questa veta ils 22 d’uost 1285 en la vegliadetgna da 71 onn. Treis dis fuva la bara tschentada si per che las roschadas sappien prender comiau dil grond sogn. Diu ha honorau quella sontga bara cun biaras miraclas e grazias. Igl onn 1671 ha papa Clemens X canonisau e tschentau Flep Benizzi denter ils sogns.