Sogn Romuald, avat e confessur.

pdf: cheu l’entira historia
Ils 7 da fevrer: Sogn Romuald, avat e confessur

Sogn Romuald ei staus il fundatur digl uorden dils Camaldulens. El fuva naschius entuorn igl onn 956 a Ravenna en l‘Italia. Entochen ch‘el ha giu vegn onns ha el gudiu tutta rihezia e libertad dil mund. Denton la providientscha divina ha vuliu che Romuald daventi in exempel da sontgadad e quei aschia:
Sergius, siu losch e garmadi bab che viveva en malapasch cun la glieud, ha duront ina dispeta, fatg in duel cun in siu agen parents. Romuald che veva mirau tier quei mazzament, ei s’enriclaus da quei crudeivel sbagl da siu bab e seretratgs en la claustra da sogn Apollinari sper Ravenna, per far leu 40 dis penetienzia. En quella claustra ruassava il tgierp da sogn Apollinaris che fuva staus uestg da Ravenna e discipel da sogn Pieder apiestel. Ina notg che Romuald urava en baselgia, ei sogn Apollinaris cumparius en gronda splendur, vestgius a moda pontificala ed intschensau tut ils altars e lu svanius. Da quella visiun semidaus, va el l’auter di tier igl avat e supplichescha per il habit da sogn Benedetg. Strusch en claustra, crescha el di per di en las vertids dalla humilitonza, obedientscha e mortificaziun. El teneva las reglas benedictinas exactamein e leva era ch’ils auters tenessien ellas. Suenter treis onns han enzaconts pli vegls e tievis buca pudiu vertir ch’in giuven dessi exempel e vegli curreger els. Per buca prender scandel, ei il sogn seretratgs sper Venezia tier il stregn eremit Marinus. Mintgadi urava ni cantava Romuald ils psalms da David cun siu meister Marinus. Quella veta strentga plascheva ad el. Suenter zacons onns ha el sco avat priu il conclus da reformar las claustras da siu patriarc sogn Benedetg, damai che la veglia disciplina era ida fetg a piarder. Confortaus cun la grazia divina, ha el mess en uorden buca mo las claustras talianas da Venezia e dalla Toscana, mobein era biaras en Frontscha. Ei vegn scret ch’el hagi en quels onns fundau 900 claustras digl uorden da sogn Benedetg. Tut quei ha el saviu contonscher cun siu bien exempel, cun far giginas, vigelgias, mortificaziuns ed exercezis spirituals. Duront tschun onns ha il sogn avat giu da cumbatter attaccas dil demuni, denton adina gudignau ellas cun las armas dalla humulitonza, dall’oraziun e cun clamar en agid il sontgissim Num da Jesus. Biaras olmas puccontas ha el rabitschau ord las grefflas dil demuni. Denter quellas fuva era Sergius, siu bab ch’ei era entraus en claustra, seconvertius e restaus leu entochen sia mort. Suenter che Romuald fuva returnaus ord Frontscha, ha imperatur Otto il tiez, nomionau il sogn per avat dalla claustra da Classe sper Ravenna. Per puder surventscher il sogn, ei il demuni sesurvius dil carstgaun e mess ses confrars en malobedientscha encunter el. Sin quei banduna el suenter dus onns la claustra e serenda puspei sin in cuolm en in eremitadi per far leu strentga penetienzia. Romuald che daventava pli e pli perfetgs, ha lu retschiert da Diu il dun dalla …