Sogn Gallus, avat e confessur.

pdf: cheu l’entira historia
Ils 16 d’october: Sogn Gallus, avat e confessur

Sogn Gallus ei naschius en Scozia. Fetg giuvens va el ad Irlanda per studegiar e ir en claustra. Muort sia sontga veta e gronda sabientscha eis el encunter sia veglia vegnius ordinaus sacerdot. Ensemen cun sogn Columban e sogn Sigisbert va el en Frontscha ed ha leu convertiu biars pagauns tier la vera cardientscha da Cristus. Sogn Columban ha buca vuliu vertir che Theodoricus, retg da Burgunda, vivi en concubinat. Cun quei vegn el catschaus naven cun sogn Gallus ed els vegnan en Svizra tudestga damaneivel da Turitg. Da leu ein ils dus missiunaris lu i encunter Bregenz e sogn Gallus derasa leu il sem dil sogn evangeli e disfa ils tempels e figuras dils fauls dieus.
Quei ha zun vilentau ils pagauns ch’els emprovan da mazzar sogn Gallus. Columban ei lu ius sin quei ell’Itala e sogn Gallus seretrai en in liug solitari per saver viver leu cun ruaus e survir sulettamein a Diu. El tschenta si ina crusch e serecamanda di e notg a Diu per puder e saver far la veglia da Diu. Quei eremitadi fuva pleins d‘animals scarponts sco luvs ed uors. Duront che sogn Gallus fageva oraziun cun la bratscha aviarta avon sia crusch, vegneva in uors per magliar las miulas paun che fuvan curdadas giu sper la crusch. El num da Diu camonda sogn Gallus a quei animal da purtar neutier lenna per metter el fiug.
Igl uors obedescha, porta neutier in grond bratsch lenna e fiera el fiug. Sogn Gallus dat lu agl uors in entir paun e camonda da seretrer e mai pli far donn alla glieud ed alla biestga.
Ils demunis che pudevan buca vertir che sogn Gallus setegni si cheu, sespruavan sin tuttas modas e manieras da scatschar il sogn ord quei solitari. Cun si’oraziun han ils demunis stuiu untgir. Sogn Gallus eregia lu ina caplutta e pli tard ina pintga claustra cun 12 cellas per ils 12 religius ch’el veva rimnau e priu per ses discipels.
Cun tut quei che vegneva regalau ad el, baghegiava el claustras e baselgias ni deva al paupers.
L’emprema e principala claustra ei stada quella che vegn aunc oz numnada la claustra da sogn Gagl, che porta en siu uoppen in uors.
Ina notg ha sogn Gallus clamau siu diacon e cumandau da preparar igl altar per ch’el sappi celebrar la sontga messa, pertgei siu bab spiritual e mussader Columban seigi spartius da questa veta e passaus tier la gloria perpetna. Perquei vegli el unfrir si a Diu il sacrifeci dalla sontga messa. E daveras, sogn Columban fuva gest quell’ura spartius.
Havend sogn Gallus luvrau e barhau biars onns per survir a Diu, eis el lu ius ad Arbon sin la fiasta da sogn Michel per perdegar. Leu survegn el ina tala febra che ha cuzzau 14 dis. Cheu retscheiva el ils sogns Sacraments e miera ils 16 d’october digl onn 640 en la vegliadetgna da 95 onns.
Il sogn tgierp ei lu vegnius menaus sin in carr da dus cavals en sia claustra e satraus leu sper igl altar che porta siu sogn num.
Las duas candeilas ch’ardevan ad Arbon sper il vischi dil sogn, eran sin igl entir viadi buca stezzas e sper la …